36 Von der Couch an den Start –Wir bringen Menschen in Bewegung DNA Dia Neie Alde 2020 Jedes Joahr hoascht halt dia Pflicht, zur Hauptvrsammlong muasch macha en Bericht. Denn älle do henna dädet gern wissa, was du en deinr Abteilong s‘ Joahr duur hoscht grissa. Em Januar send mr beim SWR gsei, hand ons do informiert, s’war scho fei. Au war‘s en riesa Spass, oimoal auf dem rota Sofa zom hocka ond so doa, als dädeschd en a laufende Kamera gucka. Wenn mir jetzt Michael Saunders, Jürgen Hörig, Michael Matting odr Annette Krause sehn, send dia jetzt älle fir eis koine Obekannte meh. Au d’Fasnet isch bei eis jedes Joahr em Programm, beim Närrischa Wochamarkt en Cannstatt standet mir aber it stramm. An dem Dag send mr richtig narret ond feired ghörig mit, da Schluss machet mr em Vreinsheim mit’m Hans seim Narragericht. Zom Besa onsres Vrtrauens, zom Hochflurbesa Glock, jo zo dem hand mr jedes Joahr zwoimoal Bock. Em Wentr em Nebazemmr, ma mechts fascht it glauba, hocket von ons meh Leit denna wia der hoat Trauba. Jo, ond em Sommr, en Glock’s Flura, do beleget mir au mendestens drei Garnitura. Den GlockWei kascht übrigens supr trenka, den dand se jetzt sogar emVreinsheim ausschenka. Fir den Abschnitt em Leaba, wenn’s wead donkler odr gar nacht, hend mr ons aufklära lau ibr Patientavrfügong ond Vorsorgevollmacht. Jo, ond worom dees Traumkino hoißt, woiß jetzt au jedes Kend, weil en dene 6 Euro Eitritt au no Kaffe ond Kuacha denna send. Zwischazeitlich wisset mrs, dr UFA-Palast ischd gschlossa, jetzt miasset mr halt uf a anders Kino hoffa. Gwandret send mr au: oimoal vom Porsche zom Neckr, ‘s hoat emmr wiedr gnieslet, abr ‘s gab koi Gemeckr. Dia klei Wandrschar hoat au deshalb so lang ausgharrt, weil se sich zwischaduur hoat emmr wiedr von enna a bitzele nassgmacht. Drauf, bei dr nexta Wandrong, hend mr schea gschwitzt, send ibr Feldweag noach Fellbach zom Kuckuck naus gflitzt. Des Mittagessa do ondrem Schirm war richtig toll, abr erscht noach‘m Eis beimMario en Schmida wared eisre Mäga richtig voll. Fir de dritt Wandrong hend mr eis s‘ Remstal rausgsuacht, zerscht noach Sommerrain gloffa, a Fahrkart‘ noach Endersbach buacht. Von do aus an dr Rems entlang isch’s ganga noach Winterbach, em Schmieg seim Radlrbesa eikehrt, des war a pfondiga Sach. Dia Führong duurs Gschäft Fellbachr Schnittrosa war saumäßig entressant, denn einiges, was der Chef do vrzählt hoat, war eis bisher it bekannt. Jedes Joahr dand mr au d‘ Fühlr aufs Volksfest ausstrecka ond land eis do donda a Moaß ond a Göckale schmecka. Em Novembr send mr ganz hoimelig gsei, hands Kegla probiert em Heim vomVrei. Jo, ond zom Schluß vom Joahr, ‘s war richtig nett, hand mr mit dr Weihnachtsfeir onsern Joahresabschluß ghet. Noach ‘m a guada Essa hand mr a paar Liadr gsonga ond zom Schluß isch au no dr Nikolaus komma. Bei dr Abteilongsvrsammlong em März 2020 hoat sich koinr vrzählt ond no hand dia Mitgliedr da gleiche Ausschuss wia bisher gwählt. Dia Vorhaba fir des Joahr schdanded au scho fest, mir heddat jetzt gwatet auf eisre Gäschd. Doch dann, dann kam Corona ond romwars’s mit dr DNA. Des Covid neunzehn, a ganz gefährliche Bazille, hoat eis älles gnomma, fascht sogar da oigena Wille. Äll’s, was ma moag ond jetzt au gern dät, des ischd vrbotta, es gilt a „Gruppa-Null-Diät“. Dohoim bleiba war jetzt s’wichtigste Gebot, dr Regierong hoat eis geba dees Vrbot. Zom Nausganga muasch jetzt a Maska traga, laut Tibengas OB Palmer däts eis Alte zerscht ganga an da Kraga. Des ganze Programm hand mr miaßa streicha, dem Corona geschuldet hoat‘s miaßa weicha. I glaub, ond des isch it blos mei Prognos, ohne Impfstoff isch nemme vill los. Mir älle brauchet jetzt a wahnsinniga Geduld, s’will jo koinr, dass mir drei vom Ausschuß häbet schuld, wenn bei so ra Vrastaltong dät ausbrecha des Corona ond no dät’s hoißa: guck, dia von dr DNA! Dia hands wiedr it vrwaata kenna ond hand scho wiedr miassa duurs Ländla renna. Sobald ma abr wiedr älles macha ka, lebt se wiedr auf, dia DNA. No send mr voll do ond zoiget dem TSV, auf Dia Neie Alte ka ma sich vrlau. En saumäßiga Dank an Daniela, ans Gschäftszemmr ond an Vorstandschaft, dia eis ganz toll ontrstützed mit ihrer Kraft. Au em Hans, seinr Küche- ond Bedienungsschar, sei en jeasses Dank gsait, isch doch sonnaklar. Wia dia den Ruaf des Vereinsheims broacht hand steil noach oba, do koascht dia blos no ibr da Schellakönig loba. I wensch dr Vrsammlong no en guada Vrlauf, denn mei Bericht isch jetzt endgültig aus. Bleibet xond! DNA Archivbilder
RkJQdWJsaXNoZXIy NDAzMjI=